Eitt dónalegt haust

2003-01-15T07:47:00.000-08:00

Nú byrjar bloggið
Komið þið öll sömul blessuð og sæl. Nú er mál til komið að vekja síðuna til lífsins. Eins og gefur að skilja hefur eitt og annað á daga mína drifið frá því í ágúst. Ágúst reyndist ekki svo skelfilegur mánuður eftir allt. Ég náði öllum prófunum og fékk mín námslán út á það. Haustið hefur farið í kennslu og baráttu hér í Hagaskóla Íslands. Tvö dónaleg haust eru komin á fullt skrið, ferðamálin eru í öruggum höndum mínum áfram, Sören orðinn viðskiptaráðunautur danska sendiráðsins í Chile og ég er á leið í framboð fyrir VG (skipa 17 sæti í RVK-kjördæmi suður)! Eftir því sem daginn lengir og snjóföl leggst yfir áður græna grundu birtir yfir öllu hér í höfuðborg dauðans. Kannski ég bloggi eitthvað á næstunni. Látið boðin berast... saludos de sigfuso

2002-08-09T11:00:00.000-07:00

Ömurlegasti mánuður ársins!
Ágústmánuður verður ömurlegasti mánuður ársins. Ég þarf að taka 3 próf og þar með er mánuðurinn ónýtur. Ég missi af veiðiferðum með orginalnum í Selá, hestaferð með Ragga, útilegum og öðrum ævintýrum. Í staðinn þarf ég að veslast upp í borg dauðans og slasaður í þokkabót. Andskotans, helvítis, djöfulsins.

2002-07-24T02:23:00.000-07:00

Jæja
Eru ekki allir í stuði? Það er farið að líða á seinni hluta dvalar minnar fyrir norðaustan. Dagurinn í gær var einn af afslappaðri dögunum í sumar. Öllum frágangi eftir Káta daga að verða lokið og fólk enn í sæluvímu. Ég fór með Birni sveitarstjóra út í Hrolllaugsstaði til þess að skoða mögulegann upphafspunkt fyrir gönguferðir. Hátíðin fór fram í blíðskaparveðri og hver viðburðurinn öðrum fremri og skemmtilegri. Ég verð að játa að hápunkturinn fyrir mig persónulega var þegar við sigldum inn á höfnina á seglskútunni Mb Haukur frá Húsavík með TF-LÍF í argandi lópas yfir okkur. Ég hef gaman af þyrlum. Sex háhyrningar í fallegri röð syntu á undan skútunni í siglingunni um fjörðinn. Þyrlan vakti mikla lukku hjá ungum sem öldnum. Það voru aðeins nokkrir sem hvörtuðu þegar þyrlan lenti við Hafliðabúð. Sá sem býr í næsta húsi var með hundinn sinn tjóðraðann út í garði og vesalings dýrið ærðist úr hræðslu. Síðan þyrlaðist ryk á þvottinn hjá nokkrum sómakonum. Síðan hélt massív dagskráin áfram. Sölvi kokkur frá Sigga Hall á Óðinsvéum sá um að elda kúffisk ofan í liðið. Kúffiskurinn hefur nú öðlast nokkra uppreisn æru enda snilldarmatur þegar rétt er með hann farið. Hreimur stóð sig vel eins og við var að búast. Það voru einhver forföll í fótboltaliði heimamanna sakir gleðskapar kvöldið áður þannig að Hreimur var settur í markið! Það var boðið upp á útsýnisflug og mikil aðsókn í það. SJS var orðinn svo strekktur að komast í heyskap að hann lét fljuga með sig beint út á tún þar sem hann stökk upp í næstu dráttarvél og fór að raka. Ballið um kvöldið var fyrnagott. Sunnudagurinn var nokkuð erfiður enda var ég orðinn langþreyttur. Það var samt gaman að vera við afhendingu Sauðaneshúsins. Veriði svo bara blessuð.

2002-07-16T10:03:00.000-07:00

Fall óvirka bloggarans
Nú nálgast hún aðal helgi sumarsins. Kátir dagar hefjast á Þórshöfn núna á föstudaginn eins og alþjóð veit. Hér hefur það helst borið til tíðinda að bærinn er þegar byrjaður að fyllast. Það þurfti bara að rétt að ýta við landanum. Sören heimsótti land og þjóð með miklum tilþrifum. Þau eru mörg eftirminnileg augnablikin úr ferð okkar um landið en vélsleðaferð á Vatnajökul og partýið hjá Gumma og sveitaballið í Hreðavatnsskála standa upp úr. Sjáumst um helgina...

2002-06-18T09:58:00.000-07:00

Sören nálgast
Það er búið að vera þreifandi vitlaust djöfulsins norðaustanrok, rigningardrulla og einstaklega ómerkilegur kuldi hér í dag og í gær. Komið samt! Sören vinur minn hefur boðað komu sína hingað til mín um miðjan júlí. Svona eiga sýslumenn að vera. Hann kemur alla leið hingað frá Hornsyld í Danmörku. Síðan er fólk í Rvk að væla um að það sé langt hingað. Ég veit að palli og ungfrúin hans koma hingað að skoða ummerkin eftir helvítis herinn. Fór á hörkuball í Valaskjálf með Stuðmönnum á sunnudagskvöldið. Þvílíkt feykna djamm. Þar hitti ég flokkssystur mínar sem voru trítilóðar og í miklu stuði. Landsbyggðin lfi! Kem suður um helgina því Magga mín er að fara að útskrifast. Staldra stutt við og fer til Færeyja á sunnudaginn með Vg þingflokknum. Það hittir svona vel á að ég fer á sama tíma og þau. Ég fer í mína fyrstu embættisferð sem ferðamálafulltrúi til vina okkar í nafnabænum. Það var svekkjandi að missa af mótmælunum þarna fyrir sunnan. Hér sást lítið til mótmæla. Hér hafa reyndar ekki brotist út pólitískátök frá því á kosningavökunni en eins og kunnugt er leystist allt upp í slagsmál út af vonbrigðum með slæmt gengi Vg. Að lokum þetta: Er Framsókn að hafna Halldóri?

2002-06-10T07:26:00.000-07:00

Landið og miðin
Jæja það er stöðugur þeytingur á manni. Kom norður aftur í gær eftir góða helgi fyrir sunnan þar sem ég var í embættisverkum og að taka á móti Möggu sem er virkilega ánægð með dvölina á Ítalíu. Hér er 20 stiga hiti eina ferðina enn og þetta er náttúrulega staðurinn til að vera á. Rífandi gangur í öllu hér. Finnst ykkur ekki mikið risið á formanni SUS þessa dagana (sem er aðstoðarmaður dómsmálaráðherra). Hvernig var þetta aftur með einstaklingsfrelsið, frelsi manna til skoðanna, orða og æðis sem og frjálsrar farar. Það er greinilega bara eitthvert grín í huga ungra Sjálfstæðismanna, nema þá að þetta sé bara frelsi sumra eins og löngum hefur verið vitað og sannar sig nú. Fínt hjá hinum hugsjónaríku ungu súsurum að bekenna þetta svona í verki! :Það er ekkert mark takandi á mótmælum þessa fólks!

2002-06-03T05:33:00.000-07:00

Djöfulsins, helvítis, andskotans!
Ég segi nú ekki annað í dag. Hvað gengur þessari þjóð til? Nú verðum við öll sem eitt að spýta vel og rækilega í lofana og hamra fyrir VG. Það var nú ekkert skrall um helgina. Fór að ná í valtara útí Hvamm á föstudagskvöldið og dreifði áburði fram á nótt á laugardagskvöldið. Kosningakvöldið var ég dyravörður í Þórsveri á kosningaballi og þar leistist allt upp í slagsmál. Menn hafa verið svona svekktir með gengi Vg. Það var lítillega tekið á mér, ekkert mikið. Ég ætla aldrei aftur að taka svona nokkuð að mér. Biðst afsökunar á því hve langt er síðan ég uppfærði. Kíkið síðan endilega í heimsókn

2002-05-16T15:51:00.000-07:00

Frí í kvöld
Þetta var nokkuð pakkaður dagur. Var að vinna fyrir hádegi og fór í jarðarför Einars Kristjáns eftir hádegi. Það er sorglegt að horfa á eftir fólki í blóma lífsins. Við erum alltaf að missa snillinga sem við megum bara alls ekki missa. Við áttum að spila á MH-balli en það var slegið af á síðustu stundu, fuss. Adios!

2002-05-15T09:10:00.000-07:00

Ekki dauðir enn!
Tónleikarnir á Gauknum í gær voru argandi snilld. Það var virkilega frábært að taka settið rækilega í gegn og setjast síðan niður og hlýða hin böndin. Góður dagur í það heila þar sem að mótmælin við Hagatorg voru upplífgandi. Það mátti sjá mörg ný andlit þar. Jæja má ekki vera að þessu, spilum á MH-balli annað kvöld og þér er ekki boðið.

2002-05-11T13:02:00.000-07:00

Til hamingju Gummi
Já Gummi vinur minn er býsna magnaður. Ég er mjög ánægður með einleikinn hans Skáld leitar harms og ætti fólk að gera sér ferð yfir í Hafnarfjörð til þess að kíkja á sýningu. Hann hefur tvinnað saman eigin geðveiki, mína, Ómars, Tryggva og heimsins eins og hann leggur sig í þessu stykki. Leikritið fjallar um klikkhausinn Jón Bjarnason sem rembist við að verða það sem hann getur ekki orðið, góður rithöfundur. Á tæpum klukkutíma rekur skáldið Jón sem kallar sig Eini með tveimur err-um Einirr. Gott verk, geðveiki hugans. Ráðstefnan í dag var djöful góð. Erindi ekki danans var mjög magnað. Hann hafði ákveðnar skoðanir á því hvernig hver og einn gæti barist fyrir friði og það var athyglisvert hvernig hann fjallaði um framtíðarþróun heimsmála. Nenni ekki að skrifa í bili enda er ég að passa fyrir Þór og Helgu og þarf að fara í babúskuleik.

2002-05-10T10:07:00.000-07:00

Tveir fílar á veski
Sitt hér með Önnu Hlíf frænku minni og er að skoða veskið hennar og á því eru myndir af tveimur fílum. Ég er að passa fyrir Lýð og Rósu í dag. Fór með stelpurnar í bæinn og ætlaði að vera svona besti frændi í heimi. Fórum fyrst að gefa öndunum brauð. Síðan var farið yfir í London sem kölluð er Londres á spænsku að kaupa ís. Ég reið ekki feitum hesti frá þeim viðskiptum því ég asnaðist til þess að kaupa ís í dollu fyrir Silju Líf og hún móðgaðist alveg hroðaleg af því að Anna Hlíf fékk í brauði. En með snarræði afgreiðslustúlkunnar tókst að bjarga þessu og hún fékk ís í brauði. Það eiga allir að fá jafnt, alltaf! Annars er lítið að frétta ég kemst ekki á setninguna ráðstefnunnar í dag en kíki á morgun. Í kvöld er Gummi að frumsýna einleikinn sinn; Skáld leitar harms. Þar verðum við Magga og Þór kemur með skilst mér. Jæja munið síðan að segja frá ráðstefnunni, mótmælum fyrir utan Hótel Sögu á þriðjudag og tónleika á Gauknum um kvöldið. Síðan verður hver og einn að vinna í sínu umhverfi og skikka menn til að kjósa Vg. HFJ og KÓP mikilvægastir. Áfram Vg og KA!

2002-05-09T16:46:00.000-07:00

Ert þú þessi Jónas?
Jæja það var skrallað í gær og eitthvað var nú þjarkað um stjórnmálin vonandi gékk ég ekki of nálægt Valda í Nato umræðunni. Ég spjallaði við Ívar Bjarklind og það leiddi út í umræður um líkurnar á hinu og þessu. Ég held því fram að það séu 1% líkur á því að maður vinni í Lottóinu en Huginn þurfti náttúrulega að eyðileggja kenninguna með einhverju tölfræðivæli. Einu sinni var stúlka sem tók þátt í ungfrú Norðurland keppninni spurð hversu miklar líkur hún teldi á að hún ynni. Hún svaraði "æi sona 7%." Eftir það hefur hún verið kölluð sjö-prósentin. En aftur að efninu. Ég rakti fyrir Ívari og öðrum sögu ótrúlegra tilviljanna sem gerðu líf mitt skemmtilegt árið sem ég bjó í Mexíkó þar sem ég dvaldi sem skiptiliði 1994-95. Eftir tvo daga í Mexíkó kom það upp úr krafsinu að Lene frá Danmörku þekkti Ragnheiði Gestsdóttur sem var dönskukennarinn minn í MA. Mánuði seinna kom hin danska stúlkan, Christine, í heimsókn til mín. Við vorum að renna í gegnum myndaalbúm og í ljós kom að ég var með mynd af frænku hennar (systkynabörn). Ég hafði sem sagt heimsótt Þór til Danmerkur þar sem hann var við nám í lýðháskólanum í Ryslinge á Fjóni. Ég hafði smellt mynd af þessari stúlku og hún var vinkona Þórs. Áður en ég fór til Mexíkó fékk ég símanúmer hjá Jónasi sem býr í Mexíkó. Ég hringdi í manninn í nóvember og spjallaði við hann. Á annan í jólum var ég á leiðina á ströndina með fjölskyldu minni. Í borginni Xalapa stoppum við á rauðu ljósi og í bílnum við hliðina á okkur var hvítt fólk. Við vorum að spá í að spyrja eruð þið gringos og segja þá "chingen a su madre." Sem betur fer slepptum við því. Bíllinn fer fram úr okkur á ljósunum og er ekki íslenska skjaldarmerkið aftan á bílnum. Ég var viss um að þar færi Jónas. Eftir að á hraðbrautina var komið aftur náðum við honum, blikuðum, renndum upp að hliðinni og ég hrópaði yfir til mannsins. Ert þú þessi Jónas? Þarna var Jónas kominn í öllu sínu veldi. Óskar Eggert Óskarsson frá Ísafirði var skiptinemi um leið og ég í Honduras. Ég var ákveðinn í að finna hann í Honduras en þegar ég kom þangað vissi ég ekki hvar hann væri. Ég kom frá El Salvador ásamt Sebatien vini mínum. Eftir hálftíma í landinu er stoppað og við förum inn í sjoppu. Fyrsti maðurinn sem ég hitti var vitaskuld Óskar! Vill ekki einhver spekingurinn reikna út líkurnar á því að þetta gerist? Ég á að geta leyst úr þessu á þriðjudag því þá fer ég í tölfræði próf.
Lifið heil!

2002-05-08T18:24:00.000-07:00

Einar Kristján Einarsson
Gengin er góður maður og tryggur. Einar bar ætíð af með afburða snilld sinni bæði í gletni og listrænum hæfileikum. Ég vota aðstandendum Einars einlæga samúð mína. Það bregður birtu á Hermundarfellið í kvöld bróðir.

2002-05-07T18:26:00.000-07:00

Að gefnu tilefni
Sumt þarf bara að segja tvisvar!

2002-05-07T18:25:00.001-07:00

Hrognin eru að koma
Núna er komin nótt og enn sit ég yfir þessu. Þetta hefur ekki verið alger tímasóun þar sem ég hef lært nokkuð í dag. Þetta gæti því orðið spennandi kapphlaup við fimmuna á morgun, það er full snemmt að óska sér til hamingju með fallið. Stelpurnar hér við hliðina á mér sem hafa vakað fram til klukkan sex undanfarnar nætur og verið mættar snemma á morgnana eru að eipa yfir þessu, stelpur! Ég hef verið gagnrýndur fyrir að blogga lítið og vilja sumir ekki setja linka yfir á mig af því að bloggsíðan mín sé dauð. Þetta er hroðaleg lenska að lýsa sí og æ yfir ótímabærum endalokum allra skapaðra hluta. Bloggsíða mín er í fullu fjöri rétt eins og TDH. Það er kannski rétt að ég hrópi út í bloggsamfélagið eins og ónefndur formaður sálugs stjórnmálaflokks gerði og segi "ég er ekki týndur!" Ég hef bara ekki haft mikin tíma fyrir bloggið þar sem ég hokra ekki yfir tölvu alla daga. Ég á sjálfur ekki tölvu og verð því að bera mig eftir björginni og stend mig nokkuð vel. Bueno esto es bastante para ahora. A los que no entienden espanjol digo "que se chingen a su madre!" Viva la nueva patria, viva la revolucion y el commandante en jefe, viva Che Guevara, Camilio Cienfuegos y Frank País! Muerte al imperialismo de los Estados Unidos. Patria o muerte! Venceremos!

2002-05-07T18:25:00.000-07:00

2002-05-07T11:26:00.000-07:00

Ömurlegur dagur í Odda
Hér hef ég hangið í allan djöfuls dag og ekkert orðið ágengt. Vinur minn Ingjaldur Hannibalsson mun geta brosað sínu þegar hann fer yfir fjandans prófið mitt. Ég felli sjálfan mig fyrirfram. Dagurinn byrjaði illa þar sem að Magga var veik í morgun og ástandið á heimilinu nokkuð eftir því. Síðan kom ég hingað og nú er klukkan orðin hálf sjö og ég hef lítið komist áfram. Ég held að það eina jákvæða við veruna í Odda hafi verið að hitta Kybelu og spjalla við hana um síldarvinnslu á Seyðisfirði og fyllerí þar í bæ á miðvikudagskvöldum. Vonandi gleðjast sannir aðdáendur TDH yfir enn einum lokalokaloka tónleikum okkar sem verða á Gauknum 14. maí. Þetta verða til helvítis með Nato tónleikar, við ásamt Naglbítunum, Rottweiler og Heiðu og heiðingjunum. Ég vona bara að veðrið hafi verið gott fyrir norðan í dag og snjó sé farið að leysa. Veriði síðan blessuð.

2002-05-06T17:14:00.000-07:00

ARG!
Fór sem fór og útlitið versnar núna með hverri mínútu. Næst er það rekstrarstjórnun hjá Ingjaldi Hannibalssyni, gaman, gaman. Sit niðri í Odda og er að reyna að klóra mig eitthvað fram úr þessu, uss. Heyrði Þórð Friðjóns segja þjóðinni að nú væri komin upp breið samstað meðal helstu frjámála "spekúlanta" landsins, vildarvina Halldórs Ásgrímssonar, Háskóla Íslands og verkalýðshreyfingarinnar um að taka upp Evruna og halda áfram af kappi í einkavæðingar nauðhyggjunni. Hann nýtur sín greinilega í nýja djobbinu og hefur gaman af því að gefa Davíð vini sínum langt nef. Aljóðarvæðingarnefnd Halldórs Ásgrímssonar hefur sem sagt skilað af sér. Já þegar krónan styrkist og fer að jafna sig eftir skakkaföl undanfarins árs þá verða menn enn harðari í áróðri sínum gegn því að halda úti sjálfstæðum gjaldmiðli! Það kostar sitt að standa utan ESB og eitt er það að halda úti sjálfstæðum gjaldmiðli sem hefur ótal kosti fyrir íslenskt efnahagslíf þar sem sveiflur ganga oftar en ekki á skjön við efnahagsveiflur á meginlandi Evrópu. Síðan verð ég að kommentera aðeins á Silfrið. Ömmi frændi var flottur að vanda en mikið ofboðslega var umhverfisráðherrann aumkunarverður með tal sitt um að við værum sko alvöru þjóð út af aðildinni að Nató. Jæja klukkan er orðin margt og ég ætla að fara að leðjast heim í háttinn.

2002-05-06T05:23:00.000-07:00

Upprisa TDH, dauði rekstrarhagfræðinnar!
Andskotinn ég er að fara í próf á eftir og líst nú hreinlega ekkert of vel á það. Þetta verður helvítis skellur. Gleðifréttir hvernig platan rokselst. Ætli Sverrir og Stebbi Páls hafi ekki keypt eintak? Það hefur verið tekið vel í hugmynd þeirra félaga að við gefum út safnplötu með bestu lögum TDH fyrir næstu jól. Að lokum vil ég bjóða landsbyggðarvininn Sverri Jak hjartanlega velkominn í Þistilfjörðin í sumar. Það veitir ekki af því að SJ sjái eitthvað meira af landinu sínu en Esjuna og sundin blá en sjóndeildarhringur SJ virðist takmarkast við það sem Reykjavík býður upp á að sjá á björtum degi.

2002-05-04T13:18:00.000-07:00

Markaðsfræði II
Snilld Íslands! Ég fór í próf seinni partinn í dag og tók þetta með trompi. Áður en inn var gengið sagði ég glaðbeittur sá fyrsti er bestur! Ég fór fyrstur út eftir klukkutíma og mér gékk bara helvíti vel. Fór beint á góðan smiðjufund Vg um jafnréttismál. Fundurinn var fínn en upp úr stendur að þegar ég snéri mér við í sæti mínu undir lok fundar var minn best man Steinþór kominn hingað á djöflaeyjuna. Steinþór heim samtökin lýsa því yfir sigri og hafa verið lögð niður. Nú er bara að prumpast í gegnum restina af prófunum og fara síðan að einbeita sér að kosningunum, ráðstefnu SHA "Friðsæl framtíð?", and Natótónleikunum á Gauknum 14. maí og vitaskuld Þistilfirðinum. Orginallinn fór til Kanada núna seinni partinn á læknafund. Því getur maður sagt við frændur vora í nýja landinu maður kemur í manns stað. Enn lengjast lífdagar TDH. Við spilum á MH-balli 16. maí og það verður nú eitthvað! Jæja er farinn að horfa á Emil í Kattholti með Önnu Hlíf Lýðsdóttur frænku minni. Lifið heil.

2002-05-01T13:52:00.000-07:00

Viva la Verzló
Hvað haldiði! TDH mun spila á vorslútti Verzló seinni partinn í maí eftir því sem nýjustu fregnir herma. Mikillar spennu gætir nú innan veggja skólans og það er mat manna að sjaldan eða aldrei hafi ríkt jafnmikill æsingur út af einu skólaballi. Geimið fer fram einhversstaðar á höfuðborgarsvæðinu og verður ekki frekar upplýst um staðsetningu þar sem að um einkasamkvæmi verður að ræða. Hætt er við því að æstir aðdáendur TDH kunni að fylkja liði til þess að hlýða á okkur enn og aftur í síðasta skipti en samkvæmið verður lokað. Ég mun mæta á þetta ball og leggja á mig ferðalag norðan úr Þistilfirði til þess. Eins og alþjóð veit mun ég starfa sem ferðamálafulltrúi Þistilfjarðar í sumar og búa hjá ömmu og afa á Gunnarsstöðum. Þetta verður sumar í lagi!

2002-05-01T05:06:00.000-07:00

Gleðilega hátíð!
Þá er hann runninn upp blessaður baráttudagurinn gott fólk. Nú er að skunda á fundi hjá öllum almennilegum fylkingum í dag og þiggja kaffi og hlýða á magnþrungnar ræður. Var að tala við mömmu og hún hafði verið á góðum fundi í Punktinum á Akureyri. Þar var Vg á heimavelli enda með fólk innan sinna raða sem þekkir vel til sögu Punktsins. Eitthvað fór hljómgrunnurinn við málflutning Vg í taugarnar á Samfylkingarframbjóðendunum og ein hreytti því út úr sér að hún vissi ekki að hún hefði verið boðuð á flokksfund Vg!

Huginn heljartröll ríður nú húsum í Hafnarfirði og ætlar að tryggja Vg stór sigur og sjálfum sér útlandsreisu fyrir vikið. Það er mjög þýðingarmikikið að menn hafi samband við alla sem þeir þekkja í þeim sveitarfélögum þar sem Vg býður fram og segi fólki að kynna sér málin og kjósa Vg og ekkert kjaftæði.

Það er ekkert að frétta af TDH sem virðist vera að lognast út af. Ég hef síðan þurft að afþakka tvö gigg með Blúsþrjótunum út af þessum heimsku prófum sem ég á eitthvað lítið erindi í en ætla samt að sullast í gegnum. Viva la revolucion!

2002-04-27T09:53:00.000-07:00

Leiðindi í lestri
Er í bókhlöðunni að ekkilæra fyrir fjandans prófin. I´m on a highway to hell eins og skáldið sagði. Hef orðið áhyggjur af öllum sköpuðum hlutum. Það er ekki til að bæta geð mitt að Sjálfstæðisflokkurinn sækji í sig veðrið og þjóðin virðist svona spennt yfir því að kjósa einkavinavæðinguna áfram yfir sig og vafasama sukkmeistara á ráðherrastólum. R-listinn verður að sækja í sig veðrið og fara að þjarma af krafti á Birni og kompaníi. Það væri sterkur leikur að halda Stefáni Jóni alveg utan við kosningabaráttuna. Það er mikið hlegið af tilburðum hans um að koma Hannesi inn í borgarmálaumræðuna. Það skot gékk engan vegin upp, var vitleysislegt enda fékk maðurinn róthögg strax til baka. Hann varð kjaftstopp og einstaklega aulalegt tilsvar hans reddaði engu. Kosningarnar snúast ekki um Hannes Hólmstein og sperring í Stefáni Jóni. Við skulum bara hafa það á hreinu að þessar kosningar snúast um það að snúið verði frá nýfrjálshyggju þrugli sem tröllríður samfélagi okkar. Það hefur enginn áhuga á því að fleygja eignum okkar fyrir ekkert fé í skoltinn á auðmönnum þjóðarinnar. Þetta mál er til dæmis eitthvað sem halda verður hátt á lofti. Það er líka einstaklega mikilvægt að halda borginni ekki síst í ljósi þess að Halldór ætlar greiniega að lúffa í Evrópuumræðunni og hanga inni með Davíð og kompaní til eilífðarnóns. Þessi ríkisstjórn ætlar sér að sitja áfram, Framsókn er ekki á förum úr sínu örugga skjóli því er nú andskotans ver og miður.

2002-04-25T11:55:00.000-07:00

Rokk on
Það var rokkabillírokk í gærkvöldi á Grandinu. Huginn og Þór fóru alveg á kostum og einnig sást til okkar ástkæra formanns. Ég sá ekki betur en að Vg-fólk væri í meirihluta. Ég er ekki sáttur við það að frambjóðendur R-listans skyldu ekki mæta með borgarstjórann í broddi fylkingar. Kosningar vinnast ekki með því að sitja heima í stofu og horfa á ríkissjónvarpið. Það var djöfuls ægilegur kraftur í Rokkslæðunni. Þær eru uppáhalds hljómsveitin mín þessa stundina. Ljósashowið sá um rótið og var ekki hress með að þurfa að pakka saman. Þetta eru nú meiru kröfurnar í þessum róturum. Það er strax búið að biðja okkur um að spila laugardaginn 18. maí fyrir R-listann. Mæta Haustin? Jæja nú ætla ég heim að borða og verið bara blessuð.

2002-04-25T11:51:00.000-07:00

Sumardagurinn fyrsti er einmitt í dag!

2002-04-24T13:43:00.000-07:00

Eftirfarandi viðtal er birt með sérstöku leyfi Praxítelesar

P:Jæja Sigfús trommari, er TDH dauð hljómsveit í dauðateygjunum?

S: Ef ég á að vera algjörlega hreinskilin get ég ekki annað en tekið undir þetta. Þó svo að bandið taki fjörkipp við og við eru það bara dauðateygjur. Ég er hræddur um að kvöldið í kvöld (R-listadjamm á Grand Rokk síðasta vetrardag) kunni að verða okkar síðasta gigg. Það var með erfiðsmunum að tókst að ná bandinu saman fyrir þetta kvöld og það er ekki laust við að þessum endurfundum fylgi spenna og innri átök hjá okkur öllum. Ekki spillir fyrir að einn harðskeittasti aðdáandi TDH, Gunnþór Eyfjörð, hefur boðað komu sína.

P:Er þá kominn tími til að taka hræið úr líkhúsinu og jarða það?

S:Ég kann nú ekki alveg við orðalagið hjá þér vinur. Það á við um okkur haustin líkt og marga forvera okkar að við hættum eiginlega ekki, við hættum bara að koma fram og talast við. Ég útiloka ekki frekara samstarf við strákana í framtíðinni en það verður augljóslega undir þeim komið. Það hefur verið rætt um að taka upp plötu í sumar einhversstaðar í Eyjafirði. En mér finnst nú hálf slappt að þetta hafi ekki verið borið undir mig með formlegum hætti. Þó svo að einhver kasti þessu fram er ekki þar með sagt að ég heyri og meðtaki. Ég vil helst hafa lögfræðinginn minn viðstaddann þegar ákvörðun um þetta eða annað tengt bandinu er tekin.

P:Er það rétt sem ég er að heyra að Gummi og Tryggvi séu leynilegir ástmenn?

S: Þeir eru alltaf að reyna að fá mig í sleik og til þess að koma við sig þegar þeir eru komnir á þriðja bjór. Ég hef alltaf sagt nei við þessu en þeir verða bara ágengari fyrir vikið. Miðað við þessa hegðan þeirra kæmi mér ekki á óvart þó eitthvað sé í gangi hjá þeim, Ég vil bara ekki taka þátt í því, það verða þeir að skilja.

P:Er Praxíteles ekki meginstoð hljómsveitarinnar og ertu ekki sammála því að Óli Njáll ætti að vera rekinn úr félaginu ef hann fer ekki að hafa sér almennilega? Eins vil ég fá svar við því hvort Praxítelesar verði ekki getið sérstaklega á næstu plötu?

S: Ég vil ekki sjá það að Óli Njáll verði rekinn, þú mátt nú bara vita það góði minn að Óli Njáll keyrði mig upp í Exxtón hér fyrr í dag til þess að ná í snák fyrir giggið í kvöld. Hann reyndist mér betri en enginn enda vildi enginn annar skutla mér í þetta. Án Óla Njáls hefði þetta gigg farið út um þúfur. Ég rakst á strákana í Landi og sonum uppi í Exxtón og þeim þótti mikið til þess koma að ég væri komin með "drum technician" á leðurbólstruðum þýskum sportbíl. (Þeir aka allir um á BMW). Óli Njáll mun fá þakkir frá mér sem og aðrir meðlimir Praxítelesar á næstu plötu þegar og ef hún kemur út. Ég get ekki lagt nægjanlega mikla áherslu á það að félagar í Praxíteles haldi friðinn. Nógur er hann titringurinn í kringum þetta band.

P: Ég verð að lýsa yfir vanþóknun minni á þessu svari. Það náttúrulega nær ekki nokkurri átt að lýst sé yfir vantrausti á sjálfann forseta Praxítelesar hér í beinni útsendingu. Ég tek þessu svari sem fyllerísrugli og óráðstali og ítreka ámynningu mína til Óla Njáls. Hins vegar vil ég í lok þessa viðtals leggja þá spurningu fyrir þig hvort einhver fái kjuðann í kvöld, verður brjálað stuð?

S: Ja það er aldrei að vita nema ég reki kjuðann upp í rassgatið á einhverjum sem á það vel skilið. Ég held að Tryggvi kynni að meta það og svo átt þú nú sjálfur skilið smá refsingu skilið fyrir tóninn í spurningum þínum. Að lokum býð ég allar sóðabrækur og sanna aðdáendur velkomna á Grandið í kvöld.

P: Í lokin vil ég minna kjósendur á að kjósa rétt. Hvar sem menn eru í sveit settir. Það eru breyttir tímar, nú er lag! Við göngum fram til sigurs.

Lifi byltingin!

2002-04-24T11:01:00.000-07:00

Gunnþór mætir!
Hinn harðhenti og hundtryggi aðdáandi TDH, Gunnþór Eyfjörð, hefur boðað komu sína í kvöld. Ég hef það á tilfinningunni að þetta verði okkar hinsta gigg.

2002-04-24T07:57:00.000-07:00

Hvar er Gummi?
Er að reyna að ná í Gumma sem svarar ekki í síma og slíkt gerir maður ekki undir lok vetrar þegar kosningar eru í nánd að auki. Ég vona að snákurinn góði gleymist ekki og einhver sé að vinna í því máli. Axel hljómaður var að hringja áðan og vantaði númerið hjá Stjána ljós sem éf hef ekki enda er mér mein illa við ljós. Vona að þetta reddist allt saman en meðlimir Rokkslæðunnar vilja vita hvenær soundtékkið verður og ég er alveg ren. Eru Gummi og Kristín ekki saman á æfingu í dag? Síðan eiga allir að mæta á þessa geðveiku Rokk í Reykjavík tónleika í kvöld þar sem við blásum í herlúðra gegn fjandans íhaldinu og lyftum R-listanum upp á æðra plan, plan dauðans! Það verða 12 vindstig í kvöld þegar Axel kveikir á kerfinu og bassatromman dynur, þið munuð fjúka upp að næsta vegg. Finnst ykkur Össur ákveðni síðan ekki góður í ríkisábyrgðarmálinu, eins og strá í vindi. Vg með 14% á Skaganum og afram nú.

2002-04-23T08:01:00.000-07:00

Rokkslæðan

Það skal tekið fram að á miðvikudaginn spilum við á R-lista giggi eins og kemur greinilega fram hjá fóstbræðrum hér að ofan. Rokkslæðan spilar þar ásamt okkur. Takið eftir því að bandið heitir Rokkslæðan ekki Rokkslæðurnar. Það er móðgun við almennilega listamenn að klúðrast með nafnið þeirra. Ég er annars í dauðanum og mjög svekktur yfir því að standa í þessum prófa skít. Það væri jú gáfulegra að vera einhversstaðar úti meðal fólksins að afla Vinstrihreyfingunni - grænu framboði fylgis. Ég vil beina því til allra þeirra sem styðja flokkinn en eru ekki virkir að gefa sig fram við starfsmann flokksins Þór Steinarsson í gegnum vg@vg.is og mæta til starfa strax. Við skulum ekki bara gagrýna Frakkana fyrir að láta þessi ósköp með fylgi Le Pen yfir sig ganga lítum í eigin barm hvert og eitt og hugsum okkar gang. Það er lenska á Íslandi að bölva stjórnmálamönnum út og suður en vera sjálfur ekki virkur. Ég hef skorað á strákana í TDH að koma til starfa fyrir VG og ég veit að þar á flokkurinn minn hauka í horni enda vandaðir menn. Aðra vil ég biðja um að taka sjálfa sig í gegn, skrá sig í Vg strax og koma í baráttuna. Söfnum liði gegn uppgangi nýfrjálshyggjunnar og fasisma hvar í heimi sem er. Lifi byltingin!

2002-04-20T09:52:00.001-07:00

Nú er ég farinn

Las mér til mikillar skemmtunar lesendabréf frá ungri stúlku sem fagnar tilkomu ungfrú Ísland.is keppninnar. Segir hún meðal annars að stúlkur með útlitslýti hafi nú fengið að taka þátt og slíkt beri að lofa! Huginn er með greinina á sinni síðu ég kann ekki svoleiðis enn þá. Er að fara úr bókhlöðu dauðans því hvergi mega vondir vera á vorin og ekki mun fjandans Natófundurinn bæta úr aðstöðuleysi nema við HÍ líkt og Kata Kak bendir á á Múrnum í dag. Gummi eigum við að kíkja út á lífið í kvöld?

2002-04-20T09:52:00.000-07:00

2002-04-20T04:15:00.000-07:00

Ágætu lesendur

Eitthvað klúðraðist uppsetning á ljóðinu Írak þarna undir lokin. Ljóðið heitir sem sagt Írak

2002-04-20T04:11:00.000-07:00

Laugardagsmorgunn
Jæja þá er ég mættur til starfa í Þjóðarbókhlöðu Íslands. Ég gerði heiðarlega tilraun til þess að blogga í gærkveldi þar sem ég sat heima hjá Dagnýju og Huginn en lítið gékk. Textinn sem ég hafði ritað inn eyddist út og eftir sat ég með sárt enni. Ergo analskilaboðin. Þarna var setið og bragðað á smápizzum og spænskum rauðvínum milli þess sem Davíð og Halldóri var bölvað. Það er sorglegt að horfa upp á þessa örmu hunda leggjast á skeljarnar eina ferðina enn fyrir bandarískum yfirvöldum og grátbiðja þau um að halda hernum hér áfram gegn eigin vilja. Mikil er reisnin yfir landsfeðrunum þessa dagana. En þeir láta sig hafa það þó niðurlægingin í væli þeirra sé alger fyrir íslensku þjóðina. "Rummy" vinur þeirra Davíðs og Halldórs gerir víst lítið annað þessa dagana en að kveinka sér undan dellunni í Davíð og Halldóri og fjölmiðlar vestan hafs grípa þetta á lofti og spyrja; eru þeir hræddir við innrás frá Grænlandi? Er nema von að spurt sé. Annars er lítið að frétta af TDH. Við gerum lítið annað en að afþakka gigg þessa dagana. Það er ansi blöðugt að geta ekki sinnt aðdáendunum svona á lokasprettinum. En annir og uppköst valda því að ekki verður við bónum brugðist. Ég vona bara að Verzlógiggið gangi eftir. Ég spilaði með Blúsþrjótunum á Celtic á fimmtudaginn og það er aldrei að vita nema ég starfi eitthvað með þeim næsta vetur. Síðan er ég að leggja drög að eigin hljómsveit sem mun heita Altari sadískrar þráhyggju. Ég ætla að syngja í þeirri hljómsveit sem mun einbeita sér að flutningi laga úr mexíkönsku kúbönsku byltingunni milli ásamt frumsömdu pólitísku efni. Ég hef lítið gert af því að yrkja undanfarið en læt fljóta með eitt klassískt hér í lókin.

Írak

Veruleikafyrrtir sitja valdhafar vesturlanda við gnægðaborðin
á meðan svelta börnin
varpa sprengjum vanans yfir varnarlausan almenning
og enn svelta börnin
hampa hetjum nútímans fyrir vel unnin verk
og börnin svelta ekki meir
þau er dauð

sólafz

2002-04-19T17:59:00.000-07:00

Blogg helvíti

Þið megið troða þessum trommukjuða upp í rassgatið á ykkur.

2002-04-17T15:16:00.000-07:00

Á morgun er allt búið
Við skulum bara hafa eitt á hreinu aðdáendur góðir að ég henti trommukjuðanum upp í loft en ekki í Tryggva. Ég var orðinn ansi brjálaður undir lok tónleikanna. Vinir mínir í slagsmálum hvor við annan og bassatrommupedallinn laus í mjög krítisku breiki í Killing in the name of. Það eru örlög þessa bands að eitthvað fari í fokk í þessu lagi. Það eina vitræna í stöðunni var að missa stjórn á sér og henda kjuðunum frá sér. Hann gat allt eins hafa farið í sjálfan mig nú eða þá Stebba og Gumma. En svona hættum við með töffaralátum. Ég vil spila á Verzlóballinu og síðan skora ég á bandið að mæta á Káta daga á Þórshöfn í sumar og taka gigg í Þórsveri. Það má síðan vel vera að við spilum eitthvað um Hvítasunnuhelgina. Siðan er ég endanlega að missa vitið í þessari helvítis viðskiptafræði og er að spá í að fara að ráðum ömmu minnar Ragnheiðar heitinnar og læra til prests! Fari síðan allt þetta prófa prump í úldið rassgat, til helvítis með ríkisstjórnina og að lokum sniðgangið ísraelskar vörur.

2002-04-10T06:52:00.000-07:00

fyrirsögn
Þá er ég víst byrjaður að blogga!!! Dauði og djöfull segi ég nú bara og spái því að þetta endist í mesta lagi fram á hádegi á einhverjum fimmtudeginum. Sit annars hjá Þór og bölva hinu og þessu af gömlum vana. Tekið skal fram að Tvö dónaleg haust hafa fyrir ítrekaðar óskir aðdáenda ákveðið að spila á Dubliners um helgina. Guiness is good for you! Sjáumst á Dubliners eða bara í rekstrarhagfræði II á eftir sem er skítafag. Bestu þakkir fá síðan Óli Njáll, gvöð og stúlkan á bláa hjólinu.

2002-04-08T15:30:00.000-07:00

Ég, um mig, frá mér, til mín

Þá er ég, Sigfús Ólafsson, ofurrokkari og kílómetrakjaftur mættur á netið. Hér er meiningin að fá útrás fyrir alla mína geðveiki og verða menn hér rakkaðir niður hægri vinstri allt eftir skapsmunum mínum í hvert skipti. Ég hef að vísu ekki hugmynd um hvernig þessi síða varð til og hef því ákveðið að líta á hana sem gjöf frá guði og nota hana mannkyninu til góðs.

Tilvitnun dagsins: "Ég er í leik við Geir frænda, ljóti kallinn telur puttana"

2002-04-08T15:07:00.000-07:00

Skrambinn sjálfur

Það lítur út fyrir að ég sé byrjaður að blogga, hvur skrambinn.